विराटनगर, २२असार । सुनसरीको गढी गाउँपालिकाले पशुपालन व्यवसायलाई प्रवर्द्धन गर्दै किसानको उत्पादन लागत घटाउने उद्देश्यले ६१ जना किसानलाई ५० प्रतिशत अनुदानमा च्यापकटर (कुट्टी काट्ने मेसिन) वितरण गरेको छ।
आइतबार गाउँपालिकामा एक कार्यक्रमको आयोजना गरि ५० प्रतिशत लागत कोशी प्रदेश सरकारको सहयोग तथा बाँकी ५० प्रतिशत लागत किसानको सहभागितामा च्यापकटर वितरण गरिएको पशु शाखा प्रमुख कुन्दन यादवले जानकारी दिनुभयो।
आयोजित कार्यक्रममा गाउँपालिका अध्यक्ष आश नारायण चौधरी र उपाध्यक्ष अनित साहले किसानलाई च्यापकटर हस्तान्तरण गर्नुभएको थियो।
गाउँपालिकाका अनुसार वितरण गरिएको च्यापकटरले हरियो घाँस तथा पराल काट्ने कार्यलाई सहज बनाउने भएकाले पशुपालक किसानलाई प्रत्यक्ष लाभ पुग्ने अपेक्षा गरिएको छ।
