कोशी प्रदेश सभाका सभामुख अम्बर बहादुर विष्टले बडा दशैं २०८१ को अवसरमा शुभकामना सन्देश जारी गरेका छन् ।
सन्देशमा सभामुख विष्टले हालै नेपालका विभिन्न स्थानहरूमा आएको बाढी र पहिरोबाट भएको जनधनको क्षतिप्रति दुःख व्यक्त गर्दै पीडित परिवारजनप्रति समवेदना प्रकट गरेका छन्। उनले घाइतेहरूको शीघ्र स्वास्थ्यलाभको कामना गर्दै बाढी पीडितहरूको खोजी कार्य तीव्र रूपमा गर्न र उचित राहतको व्यवस्थापन गर्न सरकारसँग आग्रह गरेका छन् ।
सभामुख विष्टले बडा दशैंले नेपालीहरूबीच पारस्परिक सद्भाव, सहिष्णुता र भाइचाराको सम्बन्धलाई अझ बलियो बनाउने विश्वास व्यक्त गरेका छन् । उनले स्वदेश तथा विदेशमा रहेका सम्पूर्ण नेपाली दाजुभाइ दिदीबहिनीहरूलाई सुख, शान्ति, सुस्वास्थ्य, दीर्घायु र समृद्धिको हार्दिक शुभकामना दिएका छन् ।
सन्देशको अन्त्यमा सभामुखले चाडपर्व र संस्कृतिहरूले नेपालीलाई एकताको सूत्रमा बाँध्न महत्वपूर्ण भूमिका खेल्ने उल्लेख गर्दै माता दुर्गा भवानीले सबै नेपालीबीच एकता र सहिष्णुतामा आधारित समाजको निर्माण गर्न प्रेरित गरुन् भन्ने कामना गरेका छन् ।
