१० जेठ २०८२, शुक्रबार

श्रीपञ्चमी तथा सरस्वती पूजा हर्षोल्लासका साथ मनाइँदै

Logo
डुमरलाल मेहता सोमबार, माघ २१, २०८१

विराटनगर ।  विद्या र बुद्धिकी देवी सरस्वतीको विशेष पूजा गर्दै सोमबार श्रीपञ्चमी पर्व श्रद्धा र भक्ति साथ मनाइँदै छ। विद्यार्थीहरूले कापी, कलम, वाद्ययन्त्र तथा पुस्तकहरूको पूजा गर्दै ज्ञान र सुसंस्कारको कामना गरेका छन्।

श्रीपञ्चमीलाई ‘वसन्तपञ्चमी’ पनि भनिन्छ, किनभने यो दिनदेखि सूर्य उत्तरायणतर्फ लाग्ने र वसन्त ऋतुको आगमन हुने विश्वास गरिन्छ। हिन्दू धर्मशास्त्रअनुसार, ऋग्वेदमा ‘वाग्देवी’ को नामले चिनिएकी ब्रह्मायणी (सरस्वती) को आराधना गर्नाले ज्ञान, बुद्धि र सिद्धि प्राप्त हुने उल्लेख छ। आजका दिन सरस्वतीको पूजा गरी अध्ययन आरम्भ गरेमा विद्यार्थीहरूमा विद्या र ज्ञानको वृद्धि हुने धार्मिक विश्वास छ।

यस अवसरमा विवाह, व्रतबन्ध, गुफा (सूर्य दर्शन) राख्ने तथा बालिकाहरूको बेलविवाह (इही) गर्ने जस्ता धार्मिक तथा सामाजिक कार्य गर्न शुभ मानिन्छ। साथै, बालबालिकालाई शिक्षारम्भ गराउने तथा नाक-कान छेड्न पनि आजको दिन उपयुक्त हुने धार्मिक मान्यता छ।

सुनसरीका देवानगञ्ज, बर्जु, हरिनगर, भोक्राहा नरसिंह, इनरुवा, गढी, दुहवी लगायतका पालिकाहरूमा रहेका विद्यालय तथा सरस्वती मन्दिरहरूमा बिहानैदेखि विशेष पूजा, हवन तथा भजन-कीर्तनको आयोजना गरिएको छ। श्रद्धालुहरूले विधिपूर्वक देवी सरस्वतीको आराधना गर्दै सात गेडा अक्षता निल्नाले विद्या र बुद्धि प्राप्त हुने धार्मिक विश्वास व्यक्त गरेका छन्।

विद्यालयहरूमा विद्यार्थीहरूले सरस्वती वन्दना गाएर तथा विभिन्न सांस्कृतिक कार्यक्रम प्रस्तुत गर्दै उत्सवमय वातावरण सिर्जना गरेका छन्। शिक्षा तथा संस्कृतिसँग जोडिएको यस पर्वले समाजमा ज्ञान, सद्बुद्धि र सकारात्मक ऊर्जा प्रवाह गर्ने विश्वास गरिन्छ।

प्रतिक्रिया
हाम्रो बारे

कोशी ब्रोडकास्टीङ्ग नेटवर्क प्रा. लि.
कम्पनी दर्ता नं. २६८७५६
सूचना विभाग दर्ता नं.४९३९-०८१/८२
प्रेस काउन्सिल दर्ता नं.४९४०-०८१/८२

हाम्रो टीम

अध्यक्ष  : डुमरलाल मेहता

प्रबन्ध निर्देशक: सन्तोष मेहता

सम्पादक : रणजीत कुमार मेहता

सम्पर्क

Address: Biratnagar, Morang

Gmail: [email protected]

Phone: 9746950220, 9863003300