विराटनगर । प्रधानमन्त्री केपी शर्मा ओलीले मधेश प्रदेशमा देखिएको पानी अभाव समाधानका लागि तत्काल पाँच सयवटा ‘डीप बोरिङ’ जडान गर्ने घोषणा गर्नुभएको छ ।
महोत्तरीको मटिहानी नगरपालिका–८ मा विग्ही नदीमाथिको पुल र वडा नं ६ मा निर्मित प्रसूति गृहको उद्घाटन गर्दै उहाँले सिँचाइ र खानेपानीको समस्या झेलिरहेको प्रदेशमा यथासक्य छिटो समाधान गरिने बताउनुभयो ।
तराई–मधेश क्षेत्रको हवाई निरीक्षणपछि अधिकांश जमिन सुक्खा अवस्थामा देखिएको उल्लेख गर्दै प्रधानमन्त्री ओलीले प्रदेशका आठ वटै जिल्लामा पानीको व्यवस्थाका लागि सरोकारवाला निकायहरूसँग समन्वय गरेर काम अघि बढाइने स्पष्ट गर्नुभयो ।
उहाँले सप्तरी जिल्ला कोशी नदीसँग जोडिएकाले तुलनात्मक रूपमा त्यहाँ समस्या कम रहेको तर बाँकी जिल्लामा तत्काल उपाय आवश्यक रहेको भन्दै सरकारले आवश्यक तयारी गरिरहेको जानकारी दिनुभयो ।
प्रधानमन्त्री ओलीले मधेश प्रदेशलाई विपद् प्रभावित क्षेत्रको रूपमा घोषणा गरिसकिएको जनाउँदै पानीको अभावले प्रत्यक्ष असर पाएका किसानलगायतका नागरिकका लागि विशेष कार्यक्रम सञ्चालन गरिने प्रतिवद्धता समेत जनाउनुभयो ।
