विराटनगर । राष्ट्रिय मुक्ति पार्टी नेपालका अध्यक्ष राजेन्द्र महतोले भारतसँगको सीमा विवाद समाधानका लागि युद्ध होइन, संवाद र वार्तालाई नै प्रमुख बाटो बनाउनुपर्ने बताएका छन् ।
विराटनगरमा पार्टीको मोरङ कमिटीले आयोजना गरेको पत्रकार सम्मेलनलाई सम्बोधन गर्दै उनले सुदूरपश्चिमको कालापानी, लिपुलेक र लिम्पियाधुराको समस्या दुवै देशबीचको आपसी समझदारी र कूटनीतिक पहलबाट मात्र अन्तिम नतिजामा पुर्याउन सकिने धारणा राखे ।
पूर्व उपप्रधानमन्त्रीसमेत रहिसकेका महतोले हाल सहकारी ठगी प्रकरणमा राष्ट्रिय स्वतन्त्र पार्टीका अध्यक्ष रवि लामिछानेमाथि भइरहेको कारबाहीलाई प्रसंगमा ल्याउँदै अन्य दलसँग सम्बन्धित सहकारी सञ्चालकलाई पनि उस्तै गरी कारबाहीको दायरामा ल्याउन माग गरे ।
उनले नागरिकले मेहनत र पसिनाबाट जोहो गरेको रकम सुरक्षित गर्न राज्यको दायित्व ठोस रुपमा देखिनु जरुरी भएको टिप्पणी गरे ।
उनका अनुसार मुलुकमा सुशासन, पारदर्शिता र भ्रष्टाचार नियन्त्रणलाई प्राथमिकतामा राख्न सकेमात्रै दिगो समृद्धि हासिल गर्न सकिन्छ । साथै उनले नेपालमा बसोबास गर्ने सबै जातजाति, भाषा, भेषभूषा, धर्म र संस्कृतिको संरक्षण गर्न सरकार जिम्मेवार हुनुपर्नेमा जोड दिए ।
अध्यक्ष महतोले वर्तमान सात प्रदेशको सीमा निर्धारण अवैज्ञानिक र अव्यवहारिक रहेको भन्दै यसलाई सुधार गर्नुपर्ने सुझावसमेत दिए ।
उनले संघीयता अझ सबल बनाउन आदिवासी, जनजाति, मधेसी, थारु लगायतका समुदायहरूको पहिचान सुनिश्चित गर्न आवश्यक कानूनी र संरचनात्मक व्यवस्था गर्नुपर्नेमा जोड दिए ।
यसरी, राष्ट्रिय मुक्ति पार्टी नेपालले संघीय सुधारदेखि सहकारीमा भएको ठगी नियन्त्रणसम्मका विषयमा स्पष्ट धारणा सार्वजनिक गर्दै सरकार र अन्य दलहरूलाई जनताको आकांक्षा पूरा गर्न एकजुट हुन आह्वान गरेको छ ।
