विराटनगर । नेपाल बीमा प्राधिकरणले ५६ औं वर्ष पूरा गरी ५७ औं वर्षमा प्रवेश गरेको अवसरमा नेपाल बीमा प्राधिकरण कोशी प्रदेश कार्यालयले रेडक्रस सोसाइटी मोरङ च्याप्टरसँगको सहकार्यमा रक्तदान कार्यक्रम आयोजना गरेको छ । नेपाल रेडक्रस सोसाइटी मोरङ च्याप्टरका सभापति सुकदेव मण्डलको प्रमुख आतिथ्यतामा आयोजित उक्त कार्यक्रम आज बुधबार विराटनगरमा सम्पन्न भएको छ ।
कार्यक्रममा जीवन, निर्जीवन, लघु बीमकका कर्मचारी, बीमा अभिकर्ता, बीमा सर्भेयर तथा अन्य व्यक्तिहरूको उल्लेख्य सहभागिता रहेको थियो । रक्तदान कार्यक्रममा कुल ८१ पिन्ट रगत संकलन गरिएको नेपाल बीमा प्राधिकरण विराटनगरका प्रमुख विनोद कुमार पोखरेलले जानकारी दिए ।
कार्यक्रममा बोल्दै प्रमुख पोखरेलले बीमाकर्मीले रक्तदान जस्तो मानवीय कार्यमा सहभागी भएर समाजप्रतिको आफ्नो दायित्व पूरा गरेको बताए । यसैगरी प्रमुख अतिथि मण्डलले हाल रगतको अभाव बढ्दै गएको र युवा पुस्ता विदेशिएका कारण रगतदाता कम हुँदै गइरहेको अवस्थामा यस्ता कार्यक्रमले केही भएपनि रगतको अभाव कम गर्न योगदान र्पुयाएको बताए । उनले आगामी दिनमा समेत यस्ता कार्यक्रमहरू आयोजना गर्न सुझाव दिँदै कार्यक्रमको सफलताको शुभकामना दिए ।
यसैबीच, नेपाल बीमा प्राधिकरण कोशी कार्यालयले जेष्ठ १ गते भोलि बिहिबार विराटनगरको तिनपैनीबाट महेन्द्र चोकसम्म बिहान ८ बजे प्रभातफेरी कार्यक्रम आयोजना गरी बीमा दिवस तथा ५७ औं वार्षिकोत्सव मनाउने कार्यक्रम रहेको जनाइएको छ ।