विराटनगर, २० साउन । कोशी प्रदेशका तीन जिल्लामा सक्रिय ट्रान्सफर्मर चोर गिरोहलाई प्रहरीले पक्रिएको छ । झापा, मोरङ र सुनसरीमा विद्युत ट्रान्सफर्मर चोरी गर्दै हिँडेको ७ जनाको गिरोहलाई प्रदेश प्रहरीले पक्राउ गरी मंगलबार सार्वजनिक गरेको हो ।

गत माघ १५ यता मोरङमा ८, सुनसरीमा १२ र झापामा २ गरी कुल २२ वटा ट्रान्सफर्मर चोरी भएका थिए । प्रदेश प्रहरी कार्यालयले पत्रकार सम्मेलनमार्फत चोरीमा संलग्न समूह र उनीहरूले प्रयोग गरेका सामान तथा खरिदकर्ताको विस्तृत विवरण सार्वजनिक गरेको हो ।

पक्राउ परेका चोर समूहका सदस्यहरू यस्ता छन् :

• अर्जुनकुमार माझी (४२), ग्रामथान–४, मोरङ

• इरज धामी (३१), ग्रामथान–५, मोरङ

• अनुज विश्वास (३५), दुहबी–३, सुनसरी

• प्रयाग कुमार खाँ चौधरी (३९), दुहबी–२, सुनसरी

• अर्जुन चौधरी (२६), बेलबारी–४, मोरङ

• रञ्जित तामाङ (२७), बेलबारी–३, मोरङ

• आलम मिया (३४), भारत घर, हाल दुहबी–४ ससुराली

चोरीको सामान किन्ने ६ जना पनि पक्राउ

विद्युत ट्रान्सफर्मरबाट निकालिएको तामाको तार किन्नेहरूलाई समेत प्रहरीले पक्राउ गरेको छ । पक्राउ परेकामध्ये :

• लक्ष्य प्रधान (५३), विराटनगर–३

• कृष्णगोपाल ताम्राकार (६२), विराटनगर–६

• योगेश अग्रवाल (३२), दुहबी–३

• कपिल भट्ट (३१), दुहबी–२

• सीताराम राई (३९), इटहरी–४

२ करोड बराबरको ट्रान्सफर्मर चोरी

कोशी प्रदेश प्रहरी प्रमुख डीआईजी ईश्वर कार्कीका अनुसार, पक्राउ परेका समूहले हालसम्म २ करोड रुपैयाँ बराबरका ट्रान्सफर्मर चोरी गरिसकेको पुष्टि भएको छ । चोरिएका ट्रान्सफर्मरका तामाका तार बिक्री गरेर गिरोहले ठूलो आर्थिक लाभ उठाउँदै आएको अनुसन्धानले देखाएको छ ।

चोरीमा प्रयोग भएका सामग्री र सवारीसाधन बरामद

प्रहरीले चोरीमा प्रयोग गरिएका यन्त्रहरू समेत बरामद गरेको छ । बरामद सामग्रीमा २२ थान डायल रेन्च, ३ थान सलाई रेन्च, ३ थान पिलास, ३ थान पेचकस, छिनो, साङली, कैची, र ३ थान ह्याक्सो ब्लेड रहेका छन् । साथमा प्रयोगमा ल्याइएको १ थान पिकअप गाडी र ५ वटा मोटरसाइकलसमेत नियन्त्रणमा लिइएको प्रहरीले जनाएको छ ।

---

बिजुली चोरी मात्र होइन, ट्रान्सफर्मर नै उडाउने यस्तो संगठित अपराधबिरुद्ध प्रहरीले चालेको कदम सराहनीय छ। अनुसन्धान अझै अगाडि बढिरहेको प्रहरीले जनाएको छ ।