विराटनगर । देशभर नेपाली सेना लगायतका सुरक्षा निकाय परिचालन भएपछि आज विहानदेखि दिउँसोसम्मका सुरक्षा गतिविधिमा उल्लेखनीय उपलब्धि हासिल भएको छ।
महाराजगञ्जस्थित भाटभटेनी सुपरमार्केटमा भएको लुटपाटमा संलग्न ४ जनालाई प्रहरीले पक्राउ गरेको छ। सोही क्रममा डिल्लीबजार–नारायणथान क्षेत्रमा शंकास्पद गतिविधिमा संलग्न समूहले सुरक्षा फौजलाई देखेपछि भाग्दै छोडेका नेपाली रुपैयाँ २ लाख ३२ हजार ५ सय र अमेरिकी डलर २५०० बरामद गरिएको प्रहरीले जनाएको छ।
यस्तै, सुरक्षाकर्मीहरुले हालसम्म लुटिएका हतियारमध्ये थप १ नालसहित जम्मा ३२ नाल हतियार फिर्ता पारेका छन्।
डडेलधुरास्थित जिल्ला कारागारबाट निस्केर भागेका कैदीमध्ये २६ जनालाई नियन्त्रणमा लिन सफल भएको छ भने काठमाडौं डिल्लीबजारस्थित सदर कारागारबाट भाग्ने प्रयासलाई सुरक्षाकर्मीहरुले असफल बनाएका छन्।
सुरक्षा निकायका अनुसार परिचालन अभियान अझै निरन्तर जारी रहेको र बाँकी फरारलाई समेत शीघ्र नियन्त्रणमा लिने कार्य अघि बढाइएको छ।
