विराटनगर । नेपाली सेनासहित विभिन्न सुरक्षा निकायहरू परिचालन भएपछि देशका विभिन्न स्थानमा सुरक्षा व्यवस्था कडा बनाइएको छ ।
सप्तरीको राजविराजस्थित जिल्ला कारागारबाट भाग्ने प्रयास गरिरहेका १९२ जना कैदीहरूलाई नेपाली सेनाले नियन्त्रणमा लिएको छ । सोही क्रममा कञ्चनपुरको चाँदनी नजिकै भारततर्फ भाग्दै गरेका ७ जना कैदीहरूलाई भारतीय सीमा सुरक्षा बल (एसएसबी) ले नियन्त्रणमा लिएर नेपाली सेनालाई बुझाएको छ भने १ जना कैदीलाई स्थानीयवासीले समातेका छन् । त्यस्तै १२ जना कैदी आफैँ कारागारमा फर्किएर हाजिर भएका छन् ।
यस्तै, रामेछापस्थित जिल्ला कारागारमा कैदीहरूले बाहिर जानुपर्ने माग गर्दै उत्पात मच्चाएपछि स्थिति नियन्त्रणमा लिन सेनाले गोली चलाउनुपरेको थियो । सो क्रममा १२ जना कैदी घाइते हुनुका साथै २ जनाको मृत्यु भएको पुष्टि भएको छ ।
यसैबीच, काभ्रेपलान्चोकको बनेपा–९ नयाँबस्तीमा फेला परेको शङ्कास्पद वस्तु नेपाली सेनाले सुरक्षित रूपमा डिस्पोज गरेको जनाएको छ ।
सुरक्षा निकायका अनुसार हालसम्म विभिन्न स्थानबाट ९४ नाल हतियार बरामद गरिएको छ । देशभर सुरक्षा निकायहरू सतर्क रहँदै थप कारबाही अघि बढाइरहेका छन् ।
